"எந்த நக்ஷத்திரத்தில் பிறந்தவர்கள் எந்தக் கோயிலில் சென்று வழிபட்டால் வாழ்க்கை நலம் பெறும். வாருங்கள் அது பற்றி இந்தக் கட்டுரையில் விரிவாகப் பார்ப்போம். "

"எந்த நக்ஷத்திரத்தில் பிறந்தவர்கள் எந்தக் கோயிலில் சென்று வழிபட்டால் வாழ்க்கை நலம் பெறும். வாருங்கள் அது பற்றி இந்தக் கட்டுரையில் விரிவாகப் பார்ப்போம். "

ஜோதிட சாஸ்திரத்தில் ஒவ்வொரு நக்ஷத்திரத்தில் பிறந்தவர்களும் அவரவர் நக்ஷத்திரத்திற்கு ஏற்ப வழிபட வேண்டிய கோயில்கள் என்று சில உள்ளது. அவைகள் பின்வருமாறு.

நக்ஷத்திரங்கள் 27 என்பது யாவரும் அறிந்ததே! இந்நிலையில் ஒவ்வொரு நக்ஷத்திரத்திற்கும் ஒரு கோயில் உண்டு. மேற்படி அவரவர் நக்ஷத்திரத்திற்கு உரிய கோயிலை தரிசித்தால் எண்ணற்ற நல்வாழ்வைப் பெறலாம். இதன் அடிப்படையில் 27 நக்ஷத்திரத்திற்கு உரிய கோயில்கள் பின்வருமாறு.

அஸ்வினி: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம் பிறவி மருந்தீஸ்வரர் திருக்கோவில். இந்த ஆலயம் திருவாரூரில் இருந்து 30 கிலோமீட்டர் தொலைவில் உள்ள திருத்துறைப்பூண்டியில் இருந்து மேலும் ஒரு கிலோமீட்டர் தொலைவில் இருக்கிறது. இது அஸ்வினி நக்ஷத்திரத்தில் பிறந்தவர்களுக்கான ஆலயம்.

பரணி: இந்த நக்ஷத்திரத்தில் பிறந்தவர்கள், வழிபட வேண்டிய திருத்தலம், அக்னீஸ்வரர் திருக்கோவில். இந்த ஆலயம் நல்லாடை என்ற ஊரில் உள்ளது. மயிலாடுதுறையில் இருந்து நெடுங்காடு வழியாக காரைக்கால் செல்லும் வழியில் 15 கிலோமீட்டர் தூரத்தில் இருக்கிறது. இது பரணி நக்ஷத்திரத்தில் பிறந்தவர்களுக்கான ஆலயம்.

கார்த்திகை: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம், காத்ர சுந்தரேஸ்வரர் திருக் கோவில். மயிலாடுதுறையில் இருந்து பூம்புகார் செல்லும் வழியில் 8 கிலோமீட்டர் தூரத்தில் கஞ்சா நகரம் உள்ளது. இதன் மெயின் ரோட்டில் இருந்து பிரியும் சாலையில் அரை கிலோமீட்டர் சென்றால் ஆலயத்தை அடையலாம். இது கார்த்திகை நக்ஷத்திரத்தில் பிறந்தவர்களுக்கான ஆலயம்.

ரோகிணி: இந்த நக்ஷத்திரத்தில் பிறந்தவர்கள், அவசியம் வழிபட வேண்டியது, பாண்டவதூதப் பெருமாள் திருக்கோவில். இந்த ஆலயம் காஞ்சீபுரம் ஏகாம்பரேஸ்வரர் கோவில் எதிரில் உள்ள சாலையில் அமைந்துள்ளது. இது ரோகிணி நக்ஷத்திரத்தில் பிறந்தவர்களுக்கான ஆலயம்.

மிருகஷீரிஷம்: இந்த நக்ஷத்திரத்தில் பிறந்தவர்கள், ஆதிநாராயணப் பெருமாள் கோவிலுக்குச் சென்று வழிபட வேண்டும். தஞ்சாவூரில் இருந்து திருவாரூர் செல்லும் சாலையில் 50 கிலோமீட்டர் தூரத்தில் முகூந்தனூர் என்ற ஊர் உள்ளது. இங்கிருந்து ஒரு கிலோமீட்டர் தொலைவில் இந்த ஆலயம் இருக்கிறது. இது மிருகஷீரிஷ நக்ஷத்திரத்தில் பிறந்தவர்களுக்கான ஆலயம்.

திருவாதிரை: இந்த நக்ஷத்திரத்தில் பிறந்தவர்கள், அபய வரதீஸ்வரர் ஆலயத்திற்குச் சென்று வழிபாடு செய்ய வேண்டும். இந்த ஆலயம் அதிராம்பட்டினம் என்ற ஊரில் உள்ளது. தஞ்சாவூரில் இருந்து 70 கிலோமீட்டர் தொலைவில் உள்ள பட்டுக்கோட்டைக்குச் சென்று, அங்கிருந்து 12 கிலோமீட்டர் சென்றால் இந்த ஊரை அடையலாம். இது திருவாதிரை நக்ஷத்திரத்தில் பிறந்தவர்களுக்கான ஆலயம்.

புனர்பூசம்: இந்த நக்ஷத்திரத்தில் பிறந்தவர்கள், அதிதீஸ்வரர் திருக்கோவிலை வழிபாடு செய்யுங்கள். இந்தக் கோவில் பழைய வாணியம்பாடியில் அமைந்துள்ளது. வேலூரில் இருந்து கிருஷ்ணகிரி செல்லும் வழியில் 67 கிலோமீட்டர் தொலைவில் வாணியம்பாடி உள்ளது. அங்கிருந்து 3 கிலோமீட்டரில் பழைய வாணியம்பாடி இருக்கிறது. இது புனர்பூசம் நக்ஷத்திரத்தில் பிறந்தவர்களுக்கான ஆலயம்.

பூசம்: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம், அட்சய புரீஸ்வரர் திருக் கோவில். பட்டுக்கோட்டையில் இருந்து ராமேஸ்வரம் செல்லும் கிழக்கு கடற்கரை சாலையில் 30 கிலோமீட்டர் சென்றால் விளங்குளம் என்ற ஊர் வரும். அங்கிருந்து தெற்கே 2 கிலோ மீட்டர் சென்றால் கோவிலை அடையலாம். புதுக்கோட்டையில் இருந்து பேராவூரணி வழியாகவும் விளங்குளம் வந்தடையலாம். இது பூசம் நக்ஷத்திரத்தில் பிறந்தவர்களுக்கான ஆலயம்.

ஆயில்யம்: இந்த நக்ஷத்திரத்தில் பிறந்தவர்கள், வழிபட வேண்டிய கோவில், கடற்கடேஸ்வரர் ஆலயம். கும்பகோணத்தில் இருந்து சூரியனார் கோவில் செல்லும் சாலையில் 11 கிலோமீட்டர் தூரத்தில் உள்ளது திருவிசநல்லூர். இங்கிருந்து பிரியும் ரோட்டில் 2 கிலோமீட்டர் தொலைவில் திருந்துதேவன்குடி என்ற ஊரில் இந்த ஆலயம் உள்ளது. இது ஆயில்யம் நக்ஷத்திரத்தில் பிறந்தவர்களுக்கான ஆலயம்.

மகம் : இந்த நக்ஷத்திரத்தில் பிறந்தவர்கள், மகாலிங்கேஸ்வரர் திருக்கோவிலில் வழிபட வேண்டும். திண்டுக்கல்லில் இருந்து நத்தம் செல்லும் சாலையில் 12 கிலோ மீட்டர் தூரத்தில் விராலிப்பட்டி விளக்கு உள்ளது. இங்கிருந்து 2 கிலோமீட்டர் சென்றால் ஆலயத்தை அடையலாம். இது மகம் நக்ஷத்திரத்தில் பிறந்தவர்களுக்கான ஆலயம்.

பூரம்: இந்த நக்ஷத்திரத்தில் பிறந்தவர்கள், ஸ்ரீஹரி தீர்த்தேஸ்வரர் திருக்கோவிலுக்குச் சென்று வழிபட வேண்டும். இந்த ஆலயம் திருவரங்குளம் என்ற ஊரில் உள்ளது. புதுக்கோட்டையில் இருந்து பட்டுக்கோட்டை செல்லும் வழியில் 7 கிலோமீட்டர் தொலைவில் திருவரங்குளம் உள்ளது. இது பூரம் நக்ஷத்திரத்தில் பிறந்தவர்களுக்கான ஆலயம்.

உத்தரம்: இந்த நக்ஷத்திரத்தில் பிறந்தவர்கள், மாங்கல்யேஸ்வரர் திருக்கோவில் சென்று வழிபடுங்கள். இந்த ஆலயம் இடையாற்று மங்கலம் என்ற ஊரில் உள்ளது. திருச்சி சத்திரம் பஸ்நிலையத்தில் இருந்து 22 கிலோமீட்டர் தூரத்தில் உள்ள லால்குடி சென்று, அங்கிருந்து 5 கிலோமீட்டர் சென்றால் இந்த ஆலயத்தை அடையலாம். இது உத்தரம் நக்ஷத்திரத்தில் பிறந்தவர்களுக்கான ஆலயம்.

அஸ்தம்: இந்த நக்ஷத்திரத்தில் பிறந்தவர்கள், வழிபட வேண்டியது, கிருபா கூபாரேச்வரர் திருக்கோவில். இந்த ஆலயம் 'கோமல்' என்ற ஊரில் உள்ளது. கும்பகோணத்தில் இருந்து மயிலாடுதுறை செல்லும் சாலையில் இருக்கிறது குத்தாலம். இங்கிருந்து பிரியும் சாலையில் 8 கிலோமீட்டர் சென்றால் ஆலயத்தை அடையலாம். இது அஸ்தம் நக்ஷத்திரத்தில் பிறந்தவர்களுக்கான ஆலயம்.

சித்திரை: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம், சித்திரரத வல்லபப் பெருமாள் திருக் கோவில். மதுரையில் இருந்து 23 கிலோமீட்டர் தூரத்தில் உள்ள குருவித்துறைக்கு மதுரை பெரியார் பஸ் நிலையத்தில் இருந்து பஸ் உள்ளது. குருவித்துறையில் இருந்து 3 கிலோமீட்டர் தூரத்தில் கோவில் இருக்கிறது. இது சித்திரை நக்ஷத்திரத்தில் பிறந்தவர்களுக்கான ஆலயம்.

சுவாதி: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம் தாத்திரீஸ்வரர் திருக்கோயில். இந்த ஆலயம் சித்துக்காடு என்ற ஊரில் உள்ளது. சென்னை-பூந்தமல்லி சாலையில் தண்டுரை என்ற ஊரில் இருந்து, 8 கிலோமீட்டர் தொலைவில் சித்துக்காடு உள்ளது. இது சுவாதி நக்ஷத்திரத்தில் பிறந்தவர்களுக்கான ஆலயம்.

விசாகம்: இந்த நக்ஷத்திரத்தில் பிறந்தவர்கள், வழிபட வேண்டிய ஆலயம். முத்துக்குமாரசாமி திருக்கோயில். இந்த ஆலயம் திருமலைக் கோவிலில் உள்ளது. மதுரையில் இருந்து 155 கிலோமீட்டர் தொலைவில் உள்ள செங்கோட்டை சென்று, அங்கிருந்து 7 கிலோமீட்டர் தூரத்தில் உள்ள ஆலயத்தை அடையலாம். இது விசாகம் நக்ஷத்திரத்தில் பிறந்தவர்களுக்கான ஆலயம்.

அனுஷம் : இந்த நக்ஷத்திரத்தில் பிறந்தவர்கள், வழிபட வேண்டிய ஆலயம், மகாலட்சுமிபுரீஸ் வரர் திருக்கோவில். இந்த ஆலயம் திருநின்றியூர் என்ற ஊரில் உள்ளது. மயிலாடுதுறையில் இருந்து சீர்காழி செல்லும் வழியில் 7 கிலோமீட்டர் தொலைவில் உள்ளது. இது அனுஷம் நக்ஷத்திரத்தில் பிறந்தவர்களுக்கான ஆலயம்.

கேட்டை : இந்த நக்ஷத்திரத்தில் பிறந்தவர்கள், வரதராஜப் பெருமாள் ஆலயத்திற்குச் சென்று வழிபடுங்கள். தஞ்சாவூரில் இருந்து கும்பகோணம் செல்லும் சாலையில் 13 கிலோ மீட்டர் தூரத்தில் பசுபதிகோயில் உள்ளது. பஸ் நிறுத்தத்தில் இருந்து அரை கிலோ மீட்டர் தூரத்தில் ஆலயம் இருக்கிறது. இது கேட்டை நக்ஷத்திரத்தில் பிறந்தவர்களுக்கான ஆலயம்.

மூலம் : இந்த நக்ஷத்திரத்தில் பிறந்தவர்கள், வழிபட வேண்டியது, சிங்கீஸ்வரர் திருக்கோவில். இந்த ஆலயம் 'மப்பேடு' என்ற ஊரில் உள்ளது. சென்னை கோயம்பேட்டில் இருந்து 'தக்கோலம்' செல்லும் வழியில் 45 கிலோமீட்டர் தூரத்தில் இந்தத் திருத்தலம் இருக்கிறது. பூந்தமல்லியில் இருந்து பேரம்பாக்கம் செல்லும் சாலையில் 22 கிலோமீட்டரில் மப்பேடு உள்ளது. இது மூலம் நக்ஷத்திரத்தில் பிறந்தவர்களுக்கான ஆலயம்.

பூராடம் : இந்த நக்ஷத்திரத்தில் பிறந்தவர்கள், வழிபட வேண்டிய ஆலயம், ஆகாசபுரீஸ்வரர் திருக்கோவில். இந்த ஆலயம் 'கடுவெளி' என்ற இடத்தில் இருக்கிறது. தஞ்சாவூரில் இருந்து திருவையாறு சென்று, அங்கிருந்து கல்லணை செல்லும் வழியில் 4 கிலோ மீட்டர் தூரத்தில் இருக்கிறது 'கடுவெளி' என்ற ஊர். இது பூராடம் நக்ஷத்திரத்தில் பிறந்தவர்களுக்கான ஆலயம்.

உத்திராடம் : இந்த நக்ஷத்திரத்தில் பிறந்தவர்கள், பிரம்மபுரீஸ்வரர் திருக்கோவிலில் வழிபாடு செய்ய வேண்டும். இந்த ஆலயம் பூங்குடி என்ற திருத்தலத்தில் உள்ளது. சிவகங்கையில் இருந்து காரைக்குடி செல்லும் வழியில் 12 கிலோமீட்டர் தூரத்தில் 'ஓக்கூர்' உள்ளது. இங்கிருந்து பிரியும் ரோட்டில் 3 கிலோமீட்டர் சென்றால் பூங்குடி தலத்தை அடையலாம். இது உத்திராடம் நக்ஷத்திரத்தில் பிறந்தவர்களுக்கான ஆலயம்.

திருவோணம் : இந்த நக்ஷத்திரத்தில் பிறந்தவர்கள், பிரசன்ன வெங்கடேசப் பெருமாள் கோவிலில் வழிபாடு செய்ய வேண்டும். திருப்பாற்கடல் என்ற இடத்தில் இந்த ஆலயம் இருக்கிறது. வேலூரில் இருந்து சென்னை செல்லும் சாலையில் 20 கிலோமீட்டர் தூரத்தில் காவேரிப்பாக்கம் உள்ளது. இங்கிருந்து பிரியும் ரோட்டில் 2 கிலோமீட்டர் சென்றால் ஆலயத்தை அடையலாம். ஆற்காடு, வாலாஜாவில் இருந்தும் பஸ்வசதி உள்ளது. இது திருவோணம் நக்ஷத்திரத்தில் பிறந்தவர்களுக்கான ஆலயம்.

அவிட்டம் : இந்த நக்ஷத்திரத்தில் பிறந்தவர்கள், பிரம்மஞானபுரீஸ்வரர் ஆலயத்தில் வழிபட வேண்டும். இந்த ஆலயம் 'கொருக்கை' என்ற இடத்தில் உள்ளது. கும்பகோணத்தில் இருந்து தாராசுரம், முழையூர் வழியாக மருதாநல்லூர் செல்லும் பஸ்களில் இங்கு செல்லலாம். இது அவிட்டம் நக்ஷத்திரத்தில் பிறந்தவர்களுக்கான ஆலயம்.

சதயம் : இந்த நக்ஷத்திரத்தில் பிறந்தவர்கள், அக்னிபுரீஸ்வரர் ஆலயம் சென்று வழிபடுவது நல்லது. இது 'திருப்புகலூர்' என்ற இடத்தில் உள்ளது. திருவாரூர் மாவட்டம் நன்னிலத்தில் இருந்து நாகப்பட்டினம் செல்லும் வழியில் 10 கிலோ மீட்டர் தொலைவில் இத்திருத்தலம் இருக்கிறது. இது சதயம் நக்ஷத்திரத்தில் பிறந்தவர்களுக்கான ஆலயம்.

பூரட்டாதி: இந்த நக்ஷத்திரத்தில் பிறந்தவர்கள், திருவானேஷ்வர் திருக்கோயிலில் உள்ள இறைவனை வழிபாடு செய்யுங்கள். இந்த ஆலயம் இருப்பது 'ரங்கநாதபுரம்' என்ற ஊர். திருவையாறில் இருந்து 17 கிலோமீட்டர் தூரத்தில் உள்ளது திருக்காட்டுப்பள்ளி. இங்கிருந்து அகரப்பேட்டை செல்லும் சாலையில் 2 கிலோமீட்டர் தூரத்தில் இந்தத் திருத்தலம் உள்ளது. இது பூரட்டாதி நக்ஷத்திரத்தில் பிறந்தவர்களுக்கான ஆலயம்.

உத்திரட்டாதி: இந்த நக்ஷத்திரத்தில் பிறந்தவர்கள், வழிபட வேண்டியது, சகஸ்ரலட்சுமீஸ்வரர் திருக்கோவில். இந்த ஆலயம் தீயத்தூர் என்ற இடத்தில் இருக்கிறது. புதுக்கோட்டையில் இருந்து 40 கி.மீ. தூரத்தில் உள்ள ஆவுடையார் கோவில் சென்று, அங்கிருந்து திருப்புவன வாசல் செல்லும் சாலையில் 21 கி.மீ தூரத்தில் தீயத்தூர் உள்ளது. இது உத்திரட்டாதி நக்ஷத்திரத்தில் பிறந்தவர்களுக்கான ஆலயம்.

ரேவதி: இந்த நக்ஷத்திரத்தில் பிறந்தவர்கள், வழிபட வேண்டியது, கயிலாயநாதர் ஆலயமாகும். திருச்சியிலிருந்து முசிறி சென்று, அங்கிருந்து 21 கிலோ மீட்டரில் உள்ள தாத்தய்யங்கார் பேட்டை செல்ல வேண்டும். இங்கிருந்து 5 கி.மீ. தூரத்திலுள்ள காருகுடி என்னும் இடத்தில் இந்த ஆலயம் உள்ளது. இது ரேவதி நக்ஷத்திரத்தில் பிறந்தவர்களுக்கான ஆலயம்.